അമേരിക്കയില്‍ പഠിക്കുന്ന വിദ്യാര്‍ത്ഥികള്‍ക്ക് ഉപഭാഷാ പഠനം നിര്‍ബ്ബന്ധമാണ്. കേരളത്തില്‍ നിന്നുവന്നവരും മലയാളം അറിയുന്നവരുമായ വിദ്യാര്‍ത്ഥികള്‍  മലയാളം പഠിക്കുവാന്‍ അവസരം ഇല്ലാതെ സ്പാനിഷ്, ഫ്രഞ്ച് തുടങ്ങിയ വിദേശഭാഷകള്‍ പഠിക്കുവാന്‍ നിര്ബ്ബന്ധിതരാകുന്നു. മലയാള ഭാഷാപഠന സൌകര്യങ്ങളുടെ കുറവോ, ഉള്ള അറിവ് അംഗീകരിച്ച് പരീക്ഷകള്‍ നടത്തി ക്രെഡിറ്റു കൊടുക്കാന്‍ സൌകര്യമില്ലാത്തതോ ആണ് ഇന്നുള്ള ദുര്‍ഗതിക്ക് പ്രധാന കാരണം. ഇന്റര്‍നാഷനല്‍ മലയാളം ഇന്‍സ്റ്റിറ്റ്യൂട്ട് കര്‍മ്മപഥത്തില്‍ എത്തുന്നതോടെ ശാശ്വതമായി ഈ പ്രശ്നം പരിഹരിക്കപ്പെടുമെന്ന് കരുതുന്നു. ഇതിനായി പല നടപടിക്രമങ്ങളും പൂര്‍ത്തീകരിക്കേണ്ടതുണ്ട്. ധാരാളം പണവും സമയവും ഇതിനായി ചിലവഴിക്കേണ്ടതുണ്ട്. അഞ്ചു ലക്ഷത്തോളം വരുന്ന അമേരിക്കന്‍ മലയാളി കുടുംബങ്ങള്‍ ആത്മാര്‍ത്ഥമായിപരിശ്രമിച്ചാല്‍ ഇത് സാധിച്ചെടുക്കാമെന്ന്  ഐ.എം.ഐ.യ്ക്ക് ഉത്തമ വിശ്വാസമുണ്ട്‌.

കേരള സര്‍ക്കാരും അതിന്‍റെ വിവിധ വകുപ്പുകളും വിശേഷിച്ച് 'മലയാളം മിഷനും' കേരളത്തിലെയും വിദേശങ്ങളിലെയും വിവിധ സര്‍വ്വകലാശാലകളുമായി സഹകരിച്ചായിരിക്കും ഐ. എം. ഐ. മുന്നോട്ടു പോവുക. 

 ലാന(LANA), ഫോക്കാന (FOKANA). ഫോമ (FOMAA), വേള്‍ഡ് മലയാളി കൌന്‍സിലുകള്‍ (W.M.C), പ്രവാസി മലയാളി ഫെഡറേഷന്‍(P.M.F.) തുടങ്ങി അമേരിക്കയിലുള്ള എല്ലാ മലയാളി സംഘടനകളുടെയും പ്രസ്ഥാനങ്ങളുടെയും ഒരു സ്വപ്ന പദ്ധതിയാണിത്. മലയാളത്തെ സ്നേഹിക്കുന്ന എല്ലാവരുടെയും സഹകരണം ഇതിലേയ്ക്ക് അഭ്യര്ത്ഥിക്കുന്നു.